Hófí

Síðasti skóladagurinn í hjúkrunarfræði

2009-01-22T16:38:00.004Z

Í dag var síðasti skóladagurinn minn, þ.e. síðasti fyrirlestradagurinn í B.S. gráðuna. Á morgun er ég að fara að leika við Hermann hermi í verknámsstofunni. Eftir það tekur við heilmikil lokaverkefnisvinna og verknám á Bráðamóttökunni, Gjörgæslunni, Meðgöngudeild og Hreiðrinu. Þannig að það verður nóg að gera framundan og ég verð útskrifuð áður en ég veit af. Ég er ekki alveg að trúa því að þessu sé bráðlega að fara að ljúka, en ég mun að öllum líkindum útskrifast 13.júní 2009, nema mér takist að falla eða klúðra lokaverkefninu :/

Ég er eiginlega komin á það að vinna í 1-2 ár eftir útskrift áður en ég fer í ljósmóðurfræðina. Ég er alveg komin með nóg af því að vera í skóla og þarf á smá pásu að halda. Ég hef líka áhuga á því að kynnast Vökudeildinni enn betur áður en sérhæfi mig sem ljósmóðir. Þannig að ég krosslegg fingur um að ég fái að halda áfram þar eftir útskrift. Hérna áður fyrr var barist um nýútskrifaða hjúkrunarfræðinga en eins og ástandið er í þjóðfélaginu í dag þá getur enginn verið öruggur með vinnu. Í fyrsta skiptið í langan tíma eru flest allar deildir spítalans fullmannaðar.

En núna þarf ég að skella í tvö köld rúllutertubrauð fyrir Hlaðborgð 4. árs hjúkrunarnema sem verður haldið í Eirbergi á morgun, föstudaginn 23. janúar kl. 11:30-13:30. Allir að mæta og borða eins mikið og þeir geta fyrir 1200 kr.

Hófí

Próftíð

2008-11-28T18:29:00.003Z

Þá er öllu verknámi lokið sem þýðir að próftíð er hafin. Próftaflan lítur svona út þessa önnina:

4.des Barnasjúkdómafræði kl. 9-12

9.des Heilsugæsla samfélagsins kl. 9-12

11.des Barnahjúkrun kl. 9-12

Annars vorum við Beta að fá jákvætt svar frá siðanefnd LSH með smávægilegum athugasemdum. Þannig að við erum búnar að fá leyfi til að gera rannsóknina fyrir lokaverkefið :) Sem er endalaus hamingja og mikill léttir.

Gangi ykkur öllum vel í komandi próftíð

Hófí

Mánuður í jólafrí...

2008-11-11T15:59:00.005Z

...og ég var að byrja 3ja vikna verknám í heilsugæslunni sem sýnir hvað ég fæ lítinn tíma til að læra undir próf :( En ég verð samt fegin þegar ég kemst loksins í jólafrí 11.desember. Alvöru fríið mitt byrjar reyndar ekki fyrr en 15. des eftir langa vinnuhelgi, en þá flýg ég beint norður.

Ég er búin að hafa nóg að gera síðan ég skrifaði síðast. Við Beta erum búnar að vera ofurduglegar í lokaverkefnisvinnu; lesa samtals rúmlega 50 greinar og sækja um leyfi fyrir rannsókninni til siðanefndar LSH. Þessi umsókn er sko ekki búin að vera neitt grín og vonumst við því til að fá jákvætt svar. Í síðustu viku kláraði ég svo heimahjúkrun og verkefni sem henni fylgdi. Þessir kennarar eru svo verkefnaglaðir að það hálfa væri nóg.

Í gær hóf ég svo verknám í Heilsugæslu Glæsibæjar ásamt Betu og líst rosalega vel á starfsemina þar, enda fæ ég nasaþefinn af ung- og smábarnaeftirliti og mæðravernd. Get alveg ímyndað mér að vinna sem ljósmóðir innan heilsugælsunnar einhvern tímann. Bara virkilega spennandi og góður vinnutími. Vil samt fyrst fara í aksjónið á spítalann og taka á móti börnum.

Þessu verknámi fylgja af sjálfsögðu 2 stór verkefni og 3 umræðutímar. Framundan er því mikil verkefnavinna og próf og verður lítill fréttaflutning á meðan þessu stendur. Ekki það að ég sé venjulega svo ofurdugleg að blogga ;)

Kv. Hófí

Nóg að gera í kreppunni

2008-10-10T21:22:00.007+01:00

Ég hef eiginlega ekki haft tíma til að hugsa um þetta s.k. kreppuástand sem ríkir á Íslandi. Það eina sem ég veit er að ég er fegin því að eiga ekki neinar eignir á hækkandi lánum. Allir bankar að fara á hausinn. Ég er virkilega farin að halda að útskriftarferðin endi bara í hringferð í kringum landið.

Ég á ennþá eftir 3 vaktir á bráðamóttöku barna. Þótt mér finnist ég nú eiga frekar heima á vökudeildinni þá er þetta skemmtileg og fjölbreytt deild. Allt annar taktur einhvern veginn. En þótt þetta sé búið að vera langar 2 vikur þá ég er búin að læra alveg helling og er það fyrir mestu. Ég gæti svo sem alveg hugsað mér að vinna þarna einhvern tímann, en maður er bara svo vanafastur. Ég er orðin of heimakær á vökunni. Er einmitt að fara á næturvaktahelgi þar núna á eftir. Þannig það er alveg búið að vera nóg að gera og verður þannig í þó nokkurn tíma í viðbót. Er í augnablikinu að skrifa verkefni um hægðatregðu barna, spennandi. Þetta er samt alveg ótrúlega algeng ástæða fyrir því að börn eru að koma á bráðamóttökuna.

Bestu fréttirnar sem ég hef fengið í dag er próftaflan mín, en ég er búin í prófum 11.DESEMBER, sem hefur aldrei gerst áður. Ég er mjög ánægð með þetta þótt maður fái færri daga til að lesa undir próf. Við Egill verðum svo fyrir norðan um jólin og sunnan um áramótin. Mig er bara farið að langa í malt og appelsín við að skrifa þetta.

Annars styttist óðum í norðurför hjá mér en ég á flug 23. október og verður það kærkomin 3ja daga hvíld. Plús það að ég fæ að knúsa nýjasta fjölskyldumeðliminn. Hlakka til.

Jæja,ég ætla að reyna að leggja mig smá fyrir nætuvaktina, þrátt fyrir brjálað partý í næsta húsi.

Hófí

Bráðamóttaka barna

2008-09-26T20:22:00.004+01:00

Þá er skólinn búinn og munu næstu vikur fara í verknám og lokaverkefnisvinnu. Ég byrja á því að fara á Bráðamóttöku barna næstu 3 vikurnar þannig að það eru spennandi en erfiðir tímar framundan.

Ég er ekki mjög sátt við gengið þessa dagana, sérstaklega þar sem ég er í ferðanefnd bekkjarins og við erum að reyna að plana útskriftarferð. Þetta mun allavega ekki verða ódýrt, svo mikið er víst. Það er reyndar ekki ennþá búið að ákveða hvert verður farið, eigum enn eftir að fá einhver tilboð. Það sem ég er mest spennt fyrir í augnablikinu er Egyptaland og Brasilía.

En nú er ég á leið að hitta hjúkkurnar mínar, við ætlum að útbúa strawberry daiquiry á línuna og gera það sem við gerum best: kjafta langt fram á kvöld :)

Hófí (sem er aftur orðin dökkhærð)

4. árið

2008-08-27T15:13:00.004+01:00

Þá er ég loksins farin að sjá fyrir endann á B.S. gráðunni minni, fjórða árið að hefjast og ég held ég hafi bara aldrei verið spenntari að byrja aftur í skólanum eftir sumarfrí. Enda eru áfangarnir að höfða mikið til mín, er t.d. í áfanga sem heitir Barneignir og fjölskyldan sem er eiginlega hálfgerður ljósmóðurfræðiáfangi :)

Á þessum þremur skóladögum hef ég samt komist að því að það verður alveg nóg að gera næstu mánuðina; fyrirlestrar, 3 verknám, fjöldi verkefna og svo auðvitað lokaverkefnisundirbúningur. Ég er loksins búin að ákveða lokaverkefni, en við Beta ætlum saman að gera rannsókn og fræðilega úttekt um verkjastillingar sem konur nota í fæðingu. Til að fá leyfi fyrir rannsókninni þurfum við að senda úttekt og rökstuðning fyrir rannsókninni til Vísindasiðanefndar þannig að það er ekki seinna en vænna að fara að byrja á þessu. Enda erum við búnar að vera ofursamviskusamar og byrjaðar að skipuleggja okkur í heimildaleitinni. Já og ég byrjaði að læra heima á degi 1 á þessari önn sem hefur ekki gerst alla mína skólagöngu! Veit ekki hvaðan þessi skólaorka er að koma. Það á því að taka fjórða árið með trompi, vera ofur samviskusöm og reyna að halda meðaleinkunni uppi eða jafnvel hækka hana smá :) Kannski mikil bjartsýni, kemur í ljós.

Ég flutti lögheimili mitt til Reykjavíkur fyrir stuttu síðan og er því orðin löggiltur Reykvíkingur. Ég hefði nú alveg viljað vera löggiltur Akureyringur áfram en neyddist til að gerast sunnlendingur til að fá frítt strætókort. Já, það sem maður gerir ekki fyrir 30.000 kall.

Annars splæsti ég í ný Armani gleraugu um daginn fyrir 43.000 kall! Úff, það fer nú að líða að því á næstu árum að maður fari í laser aðgerð. En það var allavega kominn tími á að endurnýja gömlu gleraugun.

Hófí

Leggja höfuðið í bleyti

2008-08-08T14:03:00.002+01:00

Ég er mikið búin að vera að velta fyrir mér lokaverkefninu mínu undanfarið; hvað ég eigi nú að taka fyrir. Komin með nokkuð margar hugmyndir og var að senda leiðbeinanda mínum þær. Verður gaman að sjá hvað henni finnst. Ég vil bara fara að ákveða þetta sem fyrst. Þoli ekki svona óvissu. Þá get ég líka byrjað að undirbúa mig fljótlega því þetta verður pottþétt mikil vinna. Ég hélt að maður væri bara að gera þetta blessaða lokaverkefni á síðustu önninni en nei, maður er víst í fullt af áföngum líka og á að skrifa lokaverkefnið á einhverjum vikum sem maður fær í "frí".

Annars skelltum við Egill okkur norður um versló. Ferðin heppnaðist vel. Fórum tvisvar í sumarbústaðinn og hittum vini og kunningja. Sigrún kenndi mér að gera rosalega góða Pina Colada sem ég mun eflaust nýta mér í framtíðnni :)

Framundan er stutt og ljúf vinnuhelgi þar sem ein stelpa í vinnunni skuldar mér 12 tíma vakt. Ákvað að nýta tækifærið og taka mér frí á sunnudaginn en þá erum við Egill búin að vera saman í 3 ár. Þetta líður allt of hratt. En við ætlum allavega að reyna að gera eitthvað skemmtilegt þá.

Annars held ég að ég sé komin með svefnsýki, sef alveg endalaust mikið. Og þá meina ég meira en venjulega sem var líka mikið :)

Hófí

Dymbill

2008-07-07T17:20:00.002+01:00

Þá er hann Dymbill farinn frá okkur, en við létum svæfa hann 5. júli síðastliðinn og var hann jarðaður í sumarbústaðnum þar sem honum leið alltaf best. Hann veiktist skyndilega 4. júli og er talið að hann hafi fengið nýrnabilun og jafnvel verið með krabbamein. Hann fæddist 20. janúar 1996 og náði því að verða rúmlega 12 ára gamall. Hans verður mjög sárt saknað.

Hófí

Leti

2008-07-02T17:35:00.003+01:00

Ástæðan fyrir því að ekkert hefur verið ritað inn á þetta blogg er einfaldlega sú að ég hef ekki nennt því af einskærri leti. Við Egill erum auðvitað löngu komin heim frá Krít og brúnkan svoleiðis rennur af okkur allt of fljótt. Þessi Krítarferð var mjög vel heppnuð og hefðum við alveg viljað vera viku lengur eða svo. Vorum ekki alveg tilbúin í að fara heim þegar á hólminn kom.

Það sem stóð uppúr ferðinni var föstudagurinn 30. maí en þá gengum við lengsta gljúfur Evrópu, Samaria. Þetta voru 16 km allt í allt, tók um 5 klst. og var ég að drepast úr strengjum í kálfunum í 4 daga eftir á! Ég sem hélt nú að ég væri í alveg ágætis formi. Myndin hér til hliðar er af mér dauðþreyttri eftir gönguna. Loksins komin á veitingastaðinn KRI KRI.

Þessa dagana er ég í 80% vinnu á Vökudeildinni. Hugsa að ég verði þar áfram næsta vetur líka með skóla. Erfitt að slíta sig frá stöðum þar sem manni líkaar vel og kann flest allt. Annars gerðist ég nú myndarleg húsmóðir um daginn og saumaði nýjar gardínur fyrir "stofu" gluggann. Kom nú bara vel út þótt ótrúlegt megi virðast og íbúðin virðulegri að sjá.

Svo er fyrirhuguð norðurferð núna um helgina, eða 4.-8 júlí.

Hófí

Fréttir úr sólinni

2008-05-23T21:14:00.002+01:00

Allt gott að frétta af okkur. Hótelið er flott, maturinn fínn og veðrið æðislegt. Við Egill ætluðum okkur svo aldeilis ekki að brenna á fyrsta degi og smurðum okkur því samviskusamlega. En allt kom fyrir ekki; ég var rúdolt með rauða trýnið og Egill varð red-neck eftir sandkastalabyggingu. Aloe vera túban sem við keyptum í fríhöfninni kom sér því að góðum notum og er ég farin að sjá fram á það að við klárum hana áður en þessari ferð lýkur.

Það var farið varlega í sólbaðið í dag og rauðum blettum hlíft með bolum. Vorum að lesa í sólbaði í dag; ég Englaflug en Egill er að lesa Harry Potter 6 en einmitt á þessu augnabliki er ég að drekka kokteilinn Harry Poter hjá honum Stelios, en hann kann að segja Skål!

Við erum núna mjög fegin að hafa tekið hálft fæði á hótelinu því það er allt frekar dýrt hér miðað við nýja gengið. Það sem við borguðum fyrir þetta hálfa fæði er pottþétt nú þegar búið að borga sig upp því Egill étur á við þrjá hesta og ég þarf alltaf að bíða eftir að hann klári matinn sinn. Þetta heyrist reglulega: "uhhh, smá kjöt í viðbót og svo eftirréttur".

Núna eru loksins komnar inn nokkrar myndir á myndasíðuna.

Segjum þetta gott í bili, kem með frekari fréttir síðar

Hófí

Krít á morgun :)

2008-05-20T19:19:00.003+01:00

Þá fer að líða að brottför hjá okkur Agli, en við eigum flug til Krítar kl. 08:00 í fyrramálið. Við ætlum að reyna að vera dugleg að koma með fréttir úr sólinni svo fólk viti nú að við séum á lífi.

Einnig ætlum við að halda úti myndasíðu, myndirnar munu birtast á þessari síðu.

Komum aftur heim 4.júní

Kv. Hófí

Komin í sumarfrí

2008-05-14T13:12:00.002+01:00

Ég er búin í prófunum. Til hamingju ég :)

Til að halda upp á það ætla ég á Osushi- the Train með Agli á eftir og grilla lamba- og svínakjöt með hjúkkunum mínum í kvöld. Þetta verður því mettandi og góður dagur. Enda æðislegt veður úti.

Hófí

Kompan og ég

2008-05-09T00:09:00.002+01:00

Þessa dagana bý ég inni í ca. 4 fermetra gluggalausu kompunni okkar (eins gott að vera ekki með mikla innilokunarkennd). Þarna sit ég á skrifborðsstólnum með einn kodda undir rassinum og annan við bakið til að reyna að koma í veg fyrir aumar rasskinnar og slæmt mjóbak. Það gengur upp og ofan. Stirðleiki og sárir vöðvar er eiginlega bara orðin hluti af próflestrinum. Ef maður er ekki stirður þá er maður ekki búinn að læra nóg ;)

Ég er orðin frekar pirruð á þessari námstækni sem ég hef tileinkað mér og felst í því að þurfa að skrifa ALLT niður sem ég ætla mér að muna. Hægri úlnliðurinn minn er alveg kominn með nóg og kvartar sáran.

Ég þoli ekki þegar það er gott veður og ég þarf að vera inni að læra. Dagurinn í dag var svoleiðis óþolandi dagur. Sólin skein sínu blíðasta og fölu kinnarnar mínar hefðu alveg verið til í að fara í sund. En nei, kompan beið mín.

Ég er mjög fegin að þessu fer að ljúka bráðum. Undanfarnir tveir dagar hafa verið sérstaklega langir og erfiðir lærdómslega séð en vonandi skilar það sér í hjúkrunarstjórnunarprófinu á morgun. Ég er alveg búin að ákveða það að taka allan daginn á morgun í frí og byrja ekki að læra undir geðið fyrr en á laugardaginn. Enda er ég að fara á útskriftarsýninguna hjá Agli annað kvöld, en þar er hann að fara að kynna borðspilið sitt

Kv. Hófí (í kvörtunarstuði)

Að setja sig í prófgírinn

2008-04-26T14:49:00.004+01:00

Þá er verknámi mínu í geðhjúkrun lokið þó svo að ég hafi reyndar misst af síðasta deginum vegna veikinda. Fékk flensuna og lá fyrir í allan gærdag. Er að jafna mig í dag en stefni á 12 tíma vinnuvakt á morgun ef heilsan leyfir. Var búin að gleyma því hvað það er ógeðslegt að vera með hita. Manni er heitt og kalt til skiptis og veit ekkert hvernig maður á að vera.

Annars er ég að setja mig í prófgírinn; raða glósum og taka til í kompunni (læriherberginu). Fer bara í 3 próf þessa önnina sem raðast svona:

Öldrunarhjúkrun 06. maí. 09:00-12:00
Hjúkrunarstjórnun 09. maí 09:00-12:00
Geðhjúkrun og geðheilbrigði 14. maí 09:00-12:00

Þannig að það er eins gott að fara að byrja að læra bráðlega. Trúi ekki alveg að ég sé að fara að klára þriðja árið.

Annars var ég að lesa þessa frétt. Hryllilegur dauðdagi. Mér er alveg sama hversu óalgengar hákarlaárásir eru, ég ætla ekki langt út í sjóinn á Krít.

Hófí

Menningarstig

2008-04-14T21:21:00.003+01:00

Við Egill toppuðum menningarskala okkar og skelltum okkur á óperuna Cosi fan tutte í gærkvöldi. Hvorugt okkar hefur nú mikinn áhuga á óperu en var tilefnið að styðja Svein, vin Egils sem fer með eitt aðalhlutverkið í þessu verki. Stóð hann sig með prýði. Að mínu mati mætti stytta verkið úr 3 klst. niður í 1 klst., aðallega vegna bakverkja sem hljótast af því að sitja í gömlum sætunum. Ég get í það minnsta sagt að ég hafi séð óperu og græði nú þó nokkur menningarstig þar.

Nú er ég búin með eina viku af þremur í geðhjúkrunarverknáminu. Eftir þessa viku get ég í það minnsta sagt að ég muni ekki starfa sem geðhjúkrunarfræðingur í framtíðinni. Þetta er svo allt annað en maður er vanur, ekki þessi föstu verk og því finnst mér oft lítið um að vera og tíminn líða hægt. Ég stefni því áfram á ljósmóðurina sem fyrr.

Ég er orðin svolítið óþolinmóð þessa dagana. Langar bara að klára þetta verknám helst í gær og drífa mig í prófin og hoppa af stað til Krítar í sól og sumaryl. En ég verð bara að bíða þolinmóð.

Hófí

Skólafríi að ljúka

2008-04-07T13:27:00.002+01:00

Ég er að fara að byrja í geðhjúkrunarverknáminu á morgun og hlakka eiginlega bara mjög mikið til. Ég er komin með nóg af því að hanga heima og reyna að læra. Einnig verður þetta verknám mjög ólíkt því sem ég hef kynnst hingað til. Ég er hins vegar ekki spennt yfir þeim verknefnum sem fylgja þessu verknámi. Af hverju þarf alltaf að vera að skemma verknámin með þessum blessuðu verkefnum?

Var að ljúka frekar þæginlegri vinnuhelgi á vökudeildinni. Það var rólegra að gera heldur en síðustu helgar og ekki skemmdi það fyrir að ein okkar kom með ís og bakaði vöfflur í gær. Svo eru foreldrar alltaf að gefa okkur nammi þegar krílin eru að útsrifast þannig að það er í raun stórhættulegt að vinna þarna ef maður er í einhverju átaki. Ég er búin að ákveða það að fara aldrei í nammibindindi aftur, því þá langar mig bara meira í nammi.

Ég fór í afar vel heppnaða sumarbústaðarferð með hjúkkunum mínum á fimmtudaginn sl., þar sem eldaður var góður matur, fengið sér í glas og spjallað fram eftir kvöldi. Eitthvað vorum við nú samt þreyttar og vorum farnar að sofa upp úr 02:00, stútfullar af mat og nammi.

Annars er lítið að frétta. Búin að næla mér í þetta skemmtilega kvef, vakna alltaf með hausverk og stífluð ég veit ekki hvert og hellur fyrir eyrum. Ekki skemmtilegt.

Hófí

Þreytt eftir næturvakt

2008-03-14T14:44:00.002Z

Ég er búin að vera að vinna mikið undanfarið í þessu skólafríi mínu. Var á næturvakt í nótt, en ég hef ekki tekið næturvaktir síðan sl. sumar. Þetta var reyndar mjög fínt og tíminn leið hratt. Alltaf jafn skrítið samt að fara heim að sofa þegar byrjað er að birta til og allir aðrir eru nýkomnir í vinnu sína. Ég er að fara á morgunvaktir um helgina þannig ég gat ekki leyft mér að sofa lengur en til kl. 14...þannig ég er frekar mygluð í augnablikinu.

Ég er mikið búin að vera að velta fyrir mér ljósmæðranáminu, hvar ég vilji læra þetta og hvort ég vilji fara strax eða ekki. Hugsa samt að ég sæki strax um hér heima til að þær viti allavega af mér því það komast ekki margir inn í einu, um 10 stk á hverju ári. Þetta kemur vonandi allt í ljós með tímanum.

Eitthvað hefur farið minna fyrir lærdómnum en ætlað var því bókin sem ég er að lesa er helv. leiðinleg. Það verður því spýtt í lófana næstu 3 vikur. Ég hef hins vegar verið ótrúlega dugleg í ræktinni (svona til að friða samviskuna í samb. við lærdómsleysið) og er meira segja farin að þyngja lóðin eitthvað.

Framundan er svo norðurför hjá okkur Agli en við verðum á Akureyri 17.-25. mars

Hófí

Skyndihjálp

2008-03-05T17:17:00.003Z

Þá er ég komin í hið langþráða skólafrí ef frí má kalla, en ég er búin að vera að vinna undanfarin 2 kvöld fór á skyndihjálparnámskeið í dag og er að vinna annað kvöld. Það er samt mikill léttir að vera búin með 2 verknám af þremur.

Á skyndihjálparnámskeiðinu í dag horfðum við á amerískt idiot-proof myndband þar sem hlutirnir eru endurteknir tvisvar og svo einu sinni enn bara til öryggis. Leikararnir með þvílíku tilþrifin sem bentu til þess að þeir hefðu líklegast aldrei verið fyrir framan myndavél á ævinni. En þetta síaðist allavega inn og ég gat brosað yfir því hvað þetta var hallærislegt á pörtum.

Því næst tók við verkleg kennsla við að hnoða og blása dúkkur af öllum stærðum. Komst að því að ég er með frekar lítinn munn miðað við fullorðins dúkkuna og þurfti því að hafa mig alla við til að ekki læki loft meðfram. Það tókst með því að galopna muninn og næstum því taka dúkkuna úr hálslið. Það var auðveldara að blása í þær með maska og belg. Einnig æfðum við okkur í að gefa dúkkunum okkar rafstuð með þar til gerðu tæki og barkaþræða þær.

Þannig að nú er ég orðin voða klár í skyndihjálp og get hugsanlega gert eitthvað af viti ef ég skyldi koma að manneskju í hjarta- eða öndunarstoppi.

Hófí

Hjúkrunarstjórnun

2008-02-25T18:34:00.003Z

heitir verknámið sem ég er í núna á 13D, þvagfæraskurðdeild. Ég er sem sagt með einn hjúkrunarfræðing og einn sjúkraliða með mér í hóp og er ég hópstjórinn. Í byrjun hverrar vaktar þarf ég að útdeila verkefnum og svo er haldinn hádegisfundur um gang mála. Ég var búin að mikla þetta allt fyrir mér áður en ég byrjaði, en svo er þetta alls ekkert svo slæmt. Þetta tekur vissulega á til lengdar því ég þarf að undirbúa mig vel fyrir hvern dag. Ég átti líka vinnuhelgi upp á Vökudeildinni þannig að ég er eiginlega bara búin að búa uppi á spítala sl. viku og orðin mjög þreytt. Ég verð því mjög fegin þegar þessu lýkur á föstudaginn. Þá verð ég komin í 5 vikna skólafrí :)

Annars er ég farin að halda framhjá myspace því Egill stofnaði Facebook handa mér í gær. Er ennþá að reyna að læra inn á það allt saman. Verð bara með bæði þótt ég sé ekki mjög virk í netheiminum.

Hófí

Eyrnatappinn

2008-02-12T11:33:00.000Z

Þess má geta að vegna veðurs er ég eiginlega orðin háð því að sofa með eyrnartappa. Vindurinn fer óstjórnlega mikið í taugarnar á mér og ef lokaður er glugginn þá verður heitt og ólíft í íbúðinni. Svo vakna ég oftast um miðja nótt við að annar tappinn er dottinn úr og hefst þá leitin mikla. Er farin að taka á það ráð að hafa aukatappa tilbúinn á náttborðinu. Skemmtileg saga.

Eins og sjá má af ofangreindri sögu er lítið að frétta af mér og mínum.

Annars vil ég benda þeim sem hafa áhuga á að kíkja á bordspil.tk en það er síða sem Egill hannaði til að sýna framvindu útskriftarverkefnis síns.

Hófí

Vel nýttar helgar

2008-01-27T18:19:00.001Z

Ég er vægast sagt búin að nýta mér undanfarnar tvær fríhelgar mínar alveg í botn. Vísindaferð, út að borða, kaffihús, matarboð, 2svar í bíó (frítt), 1x í leikhús og eitt heljarinnar djamm. Dagurinn í dag hefur hins vegar farið í mikla leti fyrir utan það að vígja nýju þvottagrindina okkar (sú gamla gaf upp öndina fyrir tilstilli of þungra handklæða). Talandi um allt þetta þá mæli ég eindregið með því að fólk skelli sér á Brúðgumann, mjög góð mynd. Ég var ekki alveg jafn hrifin af Jesus Christ Superstar.

Framundan er mikið verk, því næstu 5 vikur mun ég vera í tveimur verknámum og mun sitja sveitt við að gera öll verkefnin sem þeim fylgja. Einnig er þó nokkur vinna á Vöku framundan. Það verður því nóg að gera. Marsmánuður verður hins vegar mjög ljúfur...ætla bara að nýta tímann í smá auka vinnu, lærdóm og svo vorum við Egill að panta okkur flug norður 17.-25. mars.

Ég er vægast sagt komin með algjört ógeð á veðrinu á þessu landi. Það er alltaf brjálað rok, ég hef til að mynda ekki þorað út í allan dag því það er búið að vera alveg klikkað veður. Ég vil ekki meiri snjó/slabb/vind.

Annars er ekkert sérstakt í fréttum.

Hófí

Sprikla af sér jólaspikið

2008-01-17T14:36:00.000Z

Þá er skólinn tekinn við og vá hvað það er erfitt að vakna á morgnanna. Svo er það að vera í skólanum alveg til kl. 14 3 daga í viku kvöl og pína fyrir okkur sem eru góðu vön. Ég er búin að komast að því að mér finnst geðhjúkrun mjög skemmtileg, en öldrunarhjúkrun og hjúkrunarstjórnun fellur ekki alveg eins vel í kramið. Annars er verknámið að byrja eftir 1 1/2 viku. Mér sem finnst ég nýbúin að vera í verknámi. Byrja í öldrun og hjúkrunarstjórnun, fæ svo 5 vikna frí og svo er það geðhjúkrunin.

Árið 2008 á að vera líkamsræktarárið mikla og í tilefni þess var keypt kort í Baðhúsinu þar sem við Arna ætlum að vera rosalega duglegar að massa okkur upp. Markmiðið er að ná 10 armbeygjum á tánum (já ég er aumingi). Merkilegt hvað það eru samt margir í ræktinni eftir áramót, allir með ný áramótaheit. Ætla að sprikla af sér jólaspikið. Eitthvað held ég nú að það fækki á hlaupabrettunum þegar líða tekur á árið.

Um síðustu helgi tók ég fyrstu hjúkkuvaktirnar mínar á vökudeildinni og ég hef bara aldrei haft eins lítið að gera. Það voru svo rosalega fá börn og rólegt, en það var samt bara gott því þá gat ég gefið mér tíma til að komast betur inn í lyfjatiltekina og svona.

Þann 21. maí erum við Egill svo að fara í afslöppun og sólbað til Krítar í 2 vikur, hlakka mikið til. Hér munum við flatmaga okkur

Hófí

Nýtt ár gengið í garð

2008-01-04T00:58:00.000Z

Þessi jól hafa einkennst af miklum svefni, áti og bara almennri leti. Einnig er ég búin að nýta tímann í að lesa skáldsögur (í stað skólabóka) og ákvað ég að hafa þetta Arnaldar Indriða jól, er búin með Vetrarborgina og Harðskafa. Hver veit nema ég skelli mér á Konungsbók líka. Svo er ég búin að hafa mikið fyrir því að finna nógu stóra plötu undir 1500 kubba pússluspilið sem við Egill gáfum pabba í jólagjöf. Að lokum fann ég risahillu inni í geymslu og er pússlan vel á veg komin. Mér hefur alltaf þótt gaman að pússla.

Einkunnir litu loksins dagsins ljós fyrst í dag, eða það er að segja tvær af fimm. Fékk 8,5 í aðferðafræði og 9 í vexti&þroska og er því sátt. Vona að hinar fari að tínast inn fljótlega. Síðast þurfti ég að bíða fram í lok janúar, skulum vona að það endurtaki sig ekki.

Annars leggst árið 2008 bara vel í mig. Held það verði fróðlegt ár. Margt getur breyst á einu ári og er alltaf gaman að spekúlera hvar maður verði niðurkominn að ári liðnu. Gleðilegt nýtt ár.

Hófí

Á síðustu dropunum

2007-12-19T13:58:00.000Z

Ég þjáist af alvarlegum einbeitingarskorti í augnablikinu og ekki hjálpar það að síðasta prófið er leiðinlegasta prófið! Já, síðustu 2 dagar hafa einkennst af mikilli sjálfsvorkunn. Mér finnst ég búin að vera endalaust lengi í þessari próftíð.

En þetta er að verða búið. Sem betur fer. Eftir einn sólarhring og 6 klukkutíma verð ég komin til Akureyrar :) Það er eins gott að það verði flogið.

Hófí

Snemma að sofa í prófum???

2007-12-16T11:14:00.001Z

Ég hef alla tíð vanið mig á það að vera ekki að læra langt fram á nótt kvöldið fyrir próf. Ég hef þó gert fáeinar undantekningar á þeirri reglu, en ekki vakað lengur en til kl 02:30. Ég bara skil ekki fólk sem getur lært alla nóttina og verið með rökræna hugsun í 3ja tíma prófi til hádegis. Ég rakst á þessa grein á mbl.is í morgun. Held ég haldi mig regluna mína góðu :)

Hins vegar á ég það til að stilla vekjaraklukkuna mína á kl 06:00 morguninn sem prófið er til þess að ná að renna eina umferð gegnum aðalatriðin. Það er eitthvað sem mér finnst alveg bráðnauðsynlegt. Jafnvel að fara í sturtu kl. 6 og læra svo til að verða 8. Borða og fara beint í prófið.

Annað sem ég skil ekki er þegar fólk tekur með sér glósurnar með sér í skólann og er að lesa yfir einhver spjöld alveg fram á síðustu mínútu. Annað hvort kanntu þetta eða ekki. Það er ekki eitthvað að fara að síast inn í heilann á síðustu mínútunum fyrir próf. Plús það að maður er svo stressaður að maður meðtekur ekki neitt. Ég veit ekki, kannski er þetta einhvers konar hughreysting og stressminnkun fyrir suma.

Annars hefur gengið nokkuð vel í prófunum hingað til. Tölfræði á morgun, kvíði henni þó svo að ég tel mig kunna þetta ágætlega. Sumir kennarar eru bara þannig að maður býst við ósanngjörnu prófi sem er ekki í samræmi við kennslu og námsbók.

Egill er farinn norður þannig að ég er bara ein í slotinu í augnablikinu. Frekar leiðinlegt, en auðveldara að halda sig við lærdóminn. Ég er farin að telja niður dagana í norðurför, 4 dagar!

Ég hugga mig við nýtt hár hjá Örnu á morgun, ekki veitir af. Prófljótan er mætt á háu stigi. Merkilegt hvað bara maskari getur gert mikið kraftaverk.

Ætla að halda áfram að rembast í tölfræðinni

Hófí.

Og þá hefst próflesturinn

2007-11-26T16:52:00.001Z

Búin með verkefnin, vúbbí. Eða svona næstum því, á bara eftir að lesa yfir 14 blaðsíður eða svo. Þannig að á morgun get ég loksins farið að læra undir prófin sem byrja í næstu viku! Úff, vona að ég lendi aldrei aftur svona í síðasta verknámshóp. Þetta er aðeins of mikið af hinu góða.

Það er búið að vera cookie/harðfisk veisla hér í slotinu undanfarna daga. Mamma og pabbi fóru til Barcelona sl. fimmtudag og keyrðu við með kökur, rúllutertu, ostaköku og harðfisk frá ömmu Lillu. Ekki amalegt það. Er ekki frá því að buxnastrengurinn sé orðinn aðeins þrengri en hann var fyrir helgi :) Annars skrapp ég í bíó á Bjólfskviði í þrívídd um helgina og mæli með að aðrir geri slíkt hið sama. Mjög flott mynd. Ég skríkti allavega eins og smástelpa enda hef ég adrei séð mynd í þrívídd áður.

Annars lítur próftaflan mín svona út þessa önnina:

3. ár
11.13.14 Aðferðafræði............................................06. des. 09:00-12:00
11.13.31 Vöxtur og þroski yfir æviskeið........................10. des. 09:00-12:00
11.13.33 Hjúkrun krabbameinssjúklinga........................13. des. 09:00-12:00
11.12.25 Tölfræði.................................................17. des. 09:00-12:00
11.13.35 Hjúkrun langveikra fullorðinna........................20. des. 09:00-12:00

Sem þýðir að það er innan við mánuður í jólafrí :)

Hófí

Aftanábump

2007-11-18T22:40:00.000Z

Jæja, þá er verknámið ALVEG að fara að klárast, bara tvær vaktir eftir...og ég get ekki beðið. Ekki það að verknámið sé leiðinlegt, heldur vil ég bara fara að einbeita mér að verkefnagerð og námslestri.

Ég fór í verknám í dag, lagði af stað kl. 07:18, sem er hánótt hjá mér og óguðlegur tími til að vera fótum á sunnudagsmorgni. Ég var samt ótrúlega vakandi eitthvað og held ég að skítakuldinn hafi hjálpað eitthvað í þeim málum. Held það sé virkilega að koma vetur.

Ég fór svo með honum Orra bekkjarbróður mína í heimsókn til útskrifaðs sjúklings, en það var eitt af þeim fjölmörgu verkefnum sem við áttum að ljúka við í þessu blessaða verknámi. Hvorugt okkar á bíl þannig að hann fékk lánaðann bíl meðleigjanda síns og haldiði ekki að við höfum lennt í árekstri. Jújú, það var keyrt harkalega aftan á okkur á hringtorginu við háskólann af þessum líka stóra jeppa. Afturrúðan alveg smallaðist og það kom væn beygla ásamt brotnu bremsuljósi. Við sem betur fer í fullum rétti. Ég slapp nú við skrekkin,er bara svona í hálsinum eins ég hafi sofið illa en Orri greyjið er að drepast í hálsinum. Þetta er þá önnur aftanákeyrslan sem ég lendi í síðan ég flutti suður. Og núna á ég ekki einu sinni bíl.

Í augnablikinu hlakka ég ógurlega mikið til jólanna. Get ekki beðið eftir því að hvorki þurfa að hugsa neitt um skóla né vinnu.

Hófí

11E

2007-11-08T20:22:00.000Z

Þá er ég loksins byrjuð í verknámi á krabbameinsdeildinni. Það versta er að ég er svona á mörkunum á því að vera veik, síhóstandi og tala eins og unglingspiltur í mútum. Svona er þetta, maður hrynur niður á versta tíma sem hægt er. En það þýðir ekkert að vera veik núna, er að fara að taka 12 vaktir á 14 dögum til að klára þetta sem fyrst. Þess á milli verð ég á fullu í verkefnavinnu.

En mér líst bara mjög vel á þetta en sem komið er, það var nóg að gera í dag þannig að tíminn líður hratt. Líka gaman að komast aðeins inn í öll þessi krabbameinslyf. En já, ég verð víst mjög upptekin á næstu dögum og eiginlega bara næstu vikurnar.

Annars er ég búin að komast að því að ég get bakað eplaköku í örbylgjuofninum mínum, mmmm :)

Hófí

Þetta er að skella á...

2007-11-02T14:10:00.000Z

Síðast liðin vika hefur verið mjög ljúf, lognið á undan storminum. Vinnuhelgi framundan og verknám á krabbameinsdeild byrjar á miðvikudaginn í næstu viku. Ég ætla að reyna að taka þetta á sem stystum tíma þannig að verkefnavinnan sem fylgir falli nú ekki saman við prófupplestrarfríið. Kvíði aðallega fyrir öllum þeim verkefnum sem ég á eftir að gera.

Annars er ég frekar snemma í því þetta árið, en ég er nánast búin að afgreiða allar jólagjafirnar. Sá ekki fram á að hafa neinn annan tíma til þess. Fór meðal annars í nýju Toys 'r' us búðina á Smáratorgi og vá hvað hún er stór. Get rétt ímyndað mér hvernig væri að vera barn og koma þangað inn. Ekki leiðinlegt það.

Ég er svo komin með nýtt hár enn og aftur :) Örnu vantaði módel og þurfti hún að breyta módelinu skv. mynd af frægri persónu (því hárgreiðslufólk lendir jú oft í slíkum aðstæðum). Ég er sem sagt núna orðin Jennifer Aniston, eða er allavega með svipaðan háralit og hún og tókst þetta bara mjög vel enda Arna orðin svo svakalega klár.

Ætla að fá mér að borða áður en ég þarf að fara að vinna (Síðasta vinnuhelgin á Vökudeildinni þangað til eftir áramót :) )

Hófí

Tailenskt, já takk!

2007-10-18T16:47:00.000+01:00

Þá er fríið búið. Held ég hljóti að hafa þyngst um einhver kíló við þessa Akureyrarferð, ég borðaði svo mikið. Franska súkkulaðitertan frá Bakaríinu við Brúna er einstaklega góð ef einhver vill dekra við sig.

Núna tekur hins vegar alvaran við. Læra fullt, vinna 2 langar helgar, 12 vakta verknám á 11E, þónokkur verkefni og 5 próf.

Ég get svo ekki beðið eftir næstu Akureyrarferð sem verður jólafrí en ég pantaði mér flug eftir síðasta prófið þann 20.desember og verð alveg til 6.janúar :)

Annars er lítið að frétta. Fórum í matarboð til Róberts og Önnu í gærkvöldi, en Róbert er með Agli í skóla. Föttuðum eftir á að þetta er fyrsta svona parakvöld sem við förum farið á, merkilegt. Mjög gott kvöld, komst að því að rækjuflögur eru góðar. Held samt að þær séu eina góða tailenska snakkið sem ég hef smakkað. Við Egill fórum nefnilega í matarboð til Kötu vinkonu í síðustu viku og vantaði að drepa 20 mínútur á Hlemmi við bið eftir strætó. Skelltum okkur sem sagt í Mai Tai og keyptum 3 mjög framandi drykki og einn snakkpoka svona að gamni. Gaman að prófa nýja hluti. Eftir dýrindiskjúklingamáltiðina hennar Kötu ákvaðum við þrjú að prófa og þvílíkur viðbjóður sem einn drykkurinn var. Þetta var eins og að drekka bragðlausa olíu. Hinir voru ekki mikið skárri en þó næstum drykkjarhæfir. Ég borðaði eitt snakk og fékk nóg, allt of þurrt og sterkt. Fyndið hvað matarmenning getur verið ólík. Ef ég hefði alist upp við að drekka þennan ógeðisdrykk þá mundi ég örugglega kaupa hann í staðinn fyrir rauðan Kristal-Plús. Það finnst t.d. ekki öllum útlendingum harðfiskur góður, hvað þá tópas. Quinten Tarantino skilur ekkert í okkur íslendingum að finnst tópas-skot góð.

Ég hef líka komist að því að maður getur vanið sig á að borða hluti sem manni finnst ekkert svo góðir. Ég er til að mynda orðinn sólgin í ólífur, sem ég hataði hér áður fyrr. Ólífur eru dæmi um mat sem er góð-vondur. En ef maður borðar þær nógu oft þá fer manni að finnast æðislegar. Ég er reyndar hrifnari af svörtum ólífum heldur en grænum. Ég held að þessu sé eins farið með kaffi. Ég hata kaffi, finnst það ógeðslegt en samt finnst mér kaffilykt góð. Mig langar alveg að drekka kaffi (gott að geta gripið til þess í prófum í stað orkudrykkja), en vil samt ekki verða háð því eins og svo oft vill gerast. Ég hef því verið að prófa mig áfram í þessum málum, fæ mér Sviss Mokka en bið um að hafa bara 1/2 Expresso í honum í stað heils. Ég lennti svo í því um daginn að fara í heimsókn með Heimahlynningu til eldri konu og var hún búin að búa til Expresso handa mér. Ég náttúrulega gat ekki neitað þessari elskulegu konu sem var veik í þokkabót þannig að ég drakk þar með minn fyrsta alvöru kaffibolla. Hún bauð sem betur fer upp á súkkulaði með, sem ég lét bráðna með. Annars var þetta ekkert svo slæmt og hélt ég tilraunastarfseminni áfram hjá tengdamóður minni á Akureyri.

En nóg um matar- og menningarfræðslu.

Hófí

Hreyfiþroski barna

2007-10-05T18:11:00.000+01:00

Í augnablikinu er ég bara á fullu að vinna í 40% verkefni í vexti og þroska sem ég þarf að skila í fyrri kanntinum því ég verð fyrir norðan dagana 11.-15 október. Ég er því eiginlega búin að lesa mig fullsadda á hreyfiþroska barna. Þetta verður því lítil fríhelgi þrátt fyrir að þetta sé ekki vinnuhelgi. En ég hugga mig við Akureyri í næstu viku.

Annars er ég bara alltaf í matarboðum. Við Egill fórum í lambalæri til Eyglóar og Binna á sunnudaginn, í svín og fisk til Sverris í gær og næstkomandi þriðjudag munum við fara til Kötu í eitthvað gúmmulaði. Ekki slæmt það!

Jólin eru að koma. Allavega í Hagkaup. Mér finnst að það ætti ekki að leyfa neitt jóla fyrr en í nóvember, allavega ekki jólaauglýsingar en ég sá eina svoleiðis um daginn. Ég er nú eiginlega að svíkjast um og keypti fyrstu jólagjöfina í dag, en það var nú bara af því að ég sá eitthvað sem ég gat ekki sleppt að kaupa :) Ég get nú samt ekki annað sagt en að ég hlakki til jólanna, varð eiginlega svolítið á mis við þau í fyrra þegar við vorum á Kanarí.

Hófí

Kanarímyndir

2007-09-24T17:33:00.000+01:00

Var að setja myndir frá Kanarí síðan jól 2006 inn á myndasíðuna mína. Linkurinn er hér til vinstri undir því frumlega nafni: Myndasíðan mín :)

Verði ykkur að góðu

Hófí

Hvað er inn í dag?

2007-09-17T15:12:00.000+01:00

Argentína Steikhús er sko enginn suddastaður. Fór á þann stað í gær ásamt fríðu föruneyti tengdafjölskyldu minnar í boði yndislegrar tengdamóður minnar.Hef að ég held aldrei smakkað jafn margar kjöttegundir á ævinni: humar, hrefna, önd, vel steikt naut og eitthvað hrátt kjöt líka. En það var ekki bara kjötið og félagsskapurinn sem var góður heldur var fyrirtaksþjónusta þarna enda liggur við bara akureyringar að vinna þarna :)

X- Files er líka í uppáhaldi þessa dagana og eyðum við Egill ófáum stundum á alluc.org. Erum að tækla 2. seríuna núna. Fox og Scully í essinu sínu og David Duchovny er nú bara dáltið sætur.

Mahjong á hug minn allan. Ég er húkt. Get ekki hætt fyrr en að ég næ að klára borðið. Er komin í normal og miðar ekkert áfram.

Goldminer átti einnig hug minn allan fyrir stuttu, en ég komst yfir þá áráttu eftir að ég náði metinu hans Egils. Þá var ég sátt.

Annars er ég ekki búin vera neitt svakalega hress síðan í gærmorgun. Komin með svæsið kvef og hálsbólgu, svona þannig að mér finnst ég vera stífluð alla leið upp í ennisholurnar. Þannig að gærdagurinn var einungis nýttur í sjálfsvorkunn og að horfa á þá uppbyggilegu mynd Dumb and Dumber, ásamt tveim X-files (og svo fór ég auðvitað út að borða). Ég drullaði mér nú samt í skólann í morgunn þar sem að ég er á þeirri skoðun að maður sé ekki veikur nema maður sé með hita og ég fæ aldrei hita. Held ég taki því nú samt rólega það sem eftir er dagsins. Reyni kannski við Mahjong ;) eða jafnvel les nokkrar síður í blessuðu námsbókunum.

Hófí

Enn aftur ný síða

2007-09-13T18:27:00.000+01:00

Vegna tæknilegra örðugleika á bloggar.is síðan í sumar þá hef ég ákveðið að færa mig um set á þessa nýju síðu sem Egill hjálpaði mér með. Vona ég að samstarf mitt við blogspot.com gangi betur en bloggar.is.

Það má segja að margt hafi á daga mína drifið síðan ég var á Rhodos. Ég er orðin hvít aftur :( Fór í velheppnaða Akureyrarferð um verslunarmannahelgina og svo er skólinn auðvitað byrjaður aftur í öllu sínu veldi. Mikið að verkefnum framundan og sé ég ekki fram á mikinn frítíma. Ég ætla samt ekki að kvarta þar sem að næstu 3 vikur mun ég fá 4 1/2 daga helgarfrí sem reyndar á að nýta til hins ítrasta í ræktina og lærdóm. Ég fór í ræktina í dag, en eitthvað fór nú minna fyrir lærdómnum, held að 5 bls í The Develping Person teljist ekki með.

Já, svo má nú ekki gleyma bökunarhæfileiknunum mínum sem komu fram daginn fyrir afmælið mitt. Ég, sem á ekki einu sinni ofn ákvað nú aldeilis að vera myndarleg og bjóða fólki í afmæliskaffi. Það þýddi því ekkert annað en að bretta upp á ermar og skella í eina marengstertu, 2 súkkulaðikökur og 2 heita rétti. Þetta tókst framar öllum vonum enda hafði ég hjálparkokka og það fór allavega enginn heim með matareitrun af mér vitandi.

Ég verð svo að vinna 20 % vinnu á Vökudeildinni í vetur eins og vanalega. Fékk svo að vita að ég verð á 11E Krabbameinsdeild í verknáminu sem byrjar reyndar ekki fyrr en 7. nóvember en ég er mjög ánægð með það.

Nú er bara að sjá hvort ég verði ekki ofur dugleg að blogga í vetur...

Hófí

p.s. ný skoðanakönnun er neðst á síðunni.